இந்தியா – ஆஸ்திரேலியா ஒருநாள் கிரிக்கெட் தொடரை முன்னிட்டு, இந்திய வீரர்களின் ‘கைகுலுக்காத’ போக்கைக் கேலி செய்யும் வகையில் ஆஸ்திரேலிய வீரர்கள் மற்றும் வீராங்கனைகள் பங்கேற்ற விளம்பர வீடியோ ஒன்று வெளியாகிப் பெரும் சர்ச்சையை ஏற்படுத்தியுள்ளது.
⚠️ சர்ச்சைக்குரிய விளம்பரத்தின் விவரம்
இந்த விளம்பர வீடியோவை ‘கயோ ஸ்போர்ட்ஸ்’ (Kayo Sports) என்ற தளம் வெளியிட்டது.
வர்ணனையாளர் இயன் ஹிக்கின்ஸ், பாகிஸ்தானுக்கு எதிராக இந்திய வீரர்கள் கைகுலுக்காததை இந்திய அணியின் “மிகப்பெரிய பலவீனம்” என்று கேலி செய்தார்.
அதைத் தொடர்ந்து, ஆஸ்திரேலிய வீரர்களான ஜோஷ் ஹேசில்வுட், மிட்ச் மார்ஷ், கிளென் மேக்ஸ்வெல், அலிசா ஹீலி, அலானா கிங் மற்றும் சோஃபி மோலினக்ஸ் ஆகியோர், கைகுலுக்கலுக்குப் பதிலாக என்னென்ன ‘வாழ்த்துக்களை’த் தெரிவிக்கலாம் என்று தங்களது பாணியில் செய்து காட்டினர்.
மகளிர் அணி வீராங்கனை சோஃபி மோலினக்ஸ், தனது இரண்டு நடுவிரல்களையும் காட்டி, ‘bras d’honneur‘ எனப்படும் மிக மோசமான இத்தாலிய சைகையைச் செய்தார்.
ஜோஷ் ஹேசில்வுட், துப்பாக்கியால் சுடுவது போன்ற சைகையைச் செய்தது மேலும் அதிர்ச்சியை ஏற்படுத்தியது.
மற்ற வீரர்களும் கேலி செய்யும் வகையில் சில சைகைகளைச் செய்தனர்.
இந்த வீடியோ வெளியான சில நிமிடங்களிலேயே, இந்திய ரசிகர்கள் சமூக வலைதளங்களில் கடும் எதிர்ப்பைப் பதிவு செய்து பொங்கி எழுந்தனர். இந்திய ரசிகர்களின் எதிர்ப்பைத் தொடர்ந்து, ‘காயோ ஸ்போர்ட்ஸ்‘ தளம் அந்தச் சர்ச்சைக்குரிய வீடியோவை உடனடியாகச் சமூக வலைதளப் பக்கங்களிலிருந்தும் நீக்கியது.
இந்தக் கேலி வீடியோ குறித்து ஆஸ்திரேலிய கேப்டன் மிட்செல் மார்ஷ் மௌனம் கலைத்துள்ளார். இது தொடர்பாக அவரிடம் நிருபர்கள் கேள்வி எழுப்பியபோது, அவர் கூறியதாவது:
“நான் உண்மையில் அந்த விளம்பரத்தைப் பார்க்கவில்லை. அதில் பிரச்சினை உள்ளதா? என்று எனக்குத் தெரியவில்லை. அதைப்பற்றி நான் கருத்து தெரிவிக்க வேண்டியதில்லை.”
“இந்தியா-ஆஸ்திரேலியா வீரர்கள், ரசிகர்கள் இடையே ஒரு சிறப்பு பெற்றதாக இந்தத் தொடர் இருக்கும்.
இந்தத் தொடரின் 3 ஆட்டத்துக்கு 1.75 லட்சம் டிக்கெட்டுகள் விற்றுவிட்டதாக கூறப்படுகிறது.
விராட் கோலி, ரோகித் சர்மா ஆஸ்திரேலியாவில் விளையாடும் கடைசிப் போட்டி என்பதால் ரசிகர்களின் எதிர்பார்ப்பு அதிகமாக இருக்கிறது,” என்று தெரிவித்தார்.
